Mos rri i vetëm.

për shpirtin vetmia është vjeshtë

për trupin shkretëtirë

për sytë, veç zymtësi.

Mos rri në pritje të pafundme

as kur dritë pakëz sheh 

në fund të atij tuneli që jetë quhet

pa jetuar do mbesësh, vetë.

Nuk ia vlen të presësh të pamundurën.

Aq sa ia vlen të presësh diçka që do vijë.

por pritja është mister në vete 

më thuaj, kush pret në Sahara shi ?

Bëhu shiu i kopshtit tënd,

dielli i zambakëve të tu plot vesë.

Bëhu rrënjë, bëhu gjethe 

bëhu lule e sapoçelë.

Mos lejo tjetër kënd 

të lëndojë degë a tua fryte

shijoje tënden jetë sa frymë të kesh

e më të mos mundesh.

Ha çfarë të duash 

pa menduar për peshë,

vish çfarë të duash 

pa menduar për zhveshje.

mëso të duash më së pari veten, 

pastaj duaj kë të duash

mos u nis askund pa veten 

sepse as tjetrin nuk do dish ta duash. 

Flu Mus