Diku n'mes ndahemi ne;

në mes t'frymës edhe vdekjes

në mes të qajtunës e të qeshunës.

Diku n'mes ndahemi ne;

në mes t'rrugëve e sokaqeve

n'mes korridoreve edhe parqeve.

Diku në mes ndahemi ne;

në mes rërës e oqeanit,

në mes të ujit e të zjarrit.

Diku në mes edhe takohemi;

Shihemi, 

ndjejmë,

po s’përqafohemi!

Se dikur, 

diku, në mes u ndamë,

Na dhembi shumë, 

por kurrë se thamë.

Diku në mes ndahemi ne;

Mes jetës mbi tokë,

e asaj nën dhe.

Fitim Majkovci