Përdorimi i internetit ka qenë një gjë shumë e frytshme për shumëkënd që njoh, e sidomos për mua personalisht, ku përveç që kam njohur, e më pas edhe takuar njërin nga nismëtarët dhe zhvilluesit e këtij mediumi, Hakan Shehun, kam mësuar shumë gjëra.

Përveç meje, vërehet një rritje e numrit të personave të cilët tashmë me dashje apo dashje kanë përvetësuar gjuhën angleze për të shfrytëzuar sa më shumë mundësitë që ofrohen nga interneti, duke përfshirë këtu edhe mundësitë e shumta për të mësuar, në mesin e të cilave ndodhen edhe tekstet edukative në gjuhën angleze, të cilat përveç që përdoren për përgatitje, ato edhe këshillohen që të përdoren në lëndë të ndryshme universitare.

Ky përdorim i librave në anglisht për të mësuar ka pasur një rëndësi mjaft të madhe, i cili është përcjell edhe me ndikim në përdorimin e një fjale të cilën unë mendoj që është i pavend: përdorimi i fjalës provo. Të gjithë e dimë kuptimin e fjalës provo që nënkupton përpjekjen për të treguar për vërtetësinë apo pavërtetësinë e një gjëje, kurse kjo fjalë ka filluar të përdoret në tekste universitare si fjalë që tregon që një gjë është e vlefshme e cila duhet të tregohet, pra duke u përdorur njëlloj sikur homonimi i saj në anglisht prove.

Nga vetë përvoja e dimë që provimi i një gjëje nuk nënkupton domosdo edhe tregimin për saktësinë e saj, siç kemi shprehjet e natyrave të përpjekjeve, Provova, por dështova, ku, megjithëse mund të duket si krahasim i pavend, shfaqet thjesht përpjekja, por nuk synohet të dëshmohet ndonjë gjë, por më tepër, të jetë thjesht një rrëfim, apo pohim. Ndërsa në anglisht fjalën prove e gjejmë të përdorur për të kërkuar që të tregohet që një gjë është e saktë, si për shembull kur duam të tregojmë për saktësinë e një teoreme apo pohimi.

Ajo që dua të them është që fjala provo në tekstet edukative në përgjithësi duhet me kujdes të përdoret, duke pasur parasysh rrethanat dhe qëllimin e përdorimit: kur është për qëllim të vihet në mëdyshje vetë i pyeturi për ndonjë gjë, përdoret kjo fjalë, për shembull Provo se a vlen një pohim, kurse kur është e ditur që vlen një pohimi, atëherë fjala provo për mendimin tim më shumë do të përshtatej po të zëvendësohej me fjalët më përkatëse si trego, dëshmo, vërteto, etj.